TÜRKMENISTANYŇ MERKEZI BANKYNYŇ GYMMAT BAHALY METALLAR WE GYMMAT BAHALY DAŞLAR GAZNASY

Aşgabat şäherindäki Maslahat köşgünde 23-nji sentýabrda Türkmenistanyň Halk Maslahatynyň nobatdaky mejlisi geçirildi. Türkmenistanyň Garaşsyzlygynyň 35 ýyllyk baýramynyň öňüsyrasynda geçirilen bu möhüm çärede ýurdumyzyň durmuş-ykdysady ösüşine, halkyň abadan durmuşyny üpjün etmäge we geljekki wezipeleri kesgitlemäge degişli möhüm meseleler ara alnyp maslahatlaşyldy. Bu barada Türkmenistanyň Döwlet habarlar agentligi habar berdi.

Mejlise türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýolbaşçylyk etdi. Oňa döwlet edaralarynyň ýolbaşçylary, Mejlisiň deputatlary, jemgyýetçilik guramalarynyň wekilleri, welaýatlaryň we şäherleriň halk maslahatlarynyň agzalary hem-de beýleki çagyrylan adamlar gatnaşdylar.

Mejlisiň dowamynda Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedow hem-de Türkmenistanyň Prezidenti Serdar Berdimuhamedow çykyş etdiler. Çykyşlarda ýurdumyzyň Garaşsyzlyk ýyllarynda gazanan üstünlikleri, döwlet ösüşiniň ileri tutulýan ugurlary, halkyň abadan durmuşyny üpjün etmek boýunça alnyp barylýan işler barada giňişleýin bellenildi. Şeýle hem geljek döwür üçin kesgitlenen maksatlara ýetmekde döwlet dolandyryşynyň, ykdysady kuwwatyň we jemgyýetçilik jebisliginiň möhüm ähmiýete eýedigi nygtaldy.

Duşuşygyň dowamynda Türkmenistanyň durmuş-ykdysady ösüşiniň ileri tutulýan ugurlary, döwlet maksatnamalaryndan gelip çykýan möhüm wezipeler ara alnyp maslahatlaşyldy. Mejlisiň netijeleri boýunça ýurdumyzyň mundan beýläk-de ösdürilmegine gönükdirilen birnäçe resminamalar kabul edildi. Olaryň hatarynda hormatly ýaşululary we eneleri sylaglamak, zähmet üstünlikleri bilen tapawutlanan raýatlary Garaşsyzlygyň 35 ýyllyk baýramy mynasybetli döwlet sylaglary bilen sylaglamak, şeýle hem baýramçylyk günlerinde halkyň rahat dynç almagy üçin amatly şertleri döretmäge gönükdirilen resminamalar bar.

Şeýle hem mejlisiň dowamynda Türkmenistanyň hemişelik Bitaraplyk ýörelgelerini ösdürmäge gönükdirilen «Halkara hukugy we Türkmenistanyň Bitaraplygy» atly milli konsepsiýa, ahalteke bedewleriniň genofonduny gorap saklamaga degişli kanun taslamasy, ýaşlar syýasatyny ösdürmek boýunça 2031-nji ýyla çenli Döwlet maksatnamasy hem-de ýurdumyzyň senagat ösüşiniň uzak möhletleýin ugurlaryny kesgitleýän «Türkmenistany senagat taýdan ösdürmegiň 2030–2045-nji ýyllar üçin Milli strategiýasy» taýýarlanyldy.

Türkmenistanyň Halk Maslahatynyň mejlisine gatnaşyjylar çykyş edip, ýurdumyzyň ösüşiniň esasy ugurlary, Garaşsyzlygyň ýyllarynda gazanylan üstünlikler, döwlet maksatnamalarynyň durmuşa geçirilişi we öňde durýan möhüm wezipeler barada pikirlerini beýan etdiler. Çykyş edenler kabul edilýän çözgütleriň Watanymyzyň mundan beýläk-de gülläp ösmegine, halkyň abadan durmuşynyň üpjün edilmegine we döwlet ösüşiniň täze tapgyrlaryna gönükdirilendigini bellediler.