TÜRKMENISTANYŇ MERKEZI BANKYNYŇ GYMMAT BAHALY METALLAR WE GYMMAT BAHALY DAŞLAR GAZNASY

Tbiliside Türkmenistanyň döwlet Baştanynyň we Gruziýanyň Premýer-ministri Irakli Kobahidzeniň arasynda ilki ikiçäk formatynda, soňra bolsa wekiliýetleriň gatnaşmagynda giňeldilen düzümde ýokary derejeli gepleşikler geçirildi. Bu barada Türkmenistanyň Döwlet habarlar agentligi habar berýär.

Guralan netijeli dialogyň dowamynda taraplar özara hormat goýmak we deňhukuklylyk ýörelgelerine esaslanýan döwletara hyzmatdaşlygynyň häzirki ýokary derejesine uly baha berdiler. Özara haryt dolanşygynyň yzygiderli artmagyna we hökümetara toparynyň eýeleýän möhüm ornuna aýratyn üns berildi. Liderler ulag we energetika ulgamlaryny, hususan-da, «Lazulit» (Owganystan–Türkmenistan–Azerbaýjan–Gruziýa–Türkiýe) halkara ulag geçelgesini öňe sürmegi hem-de Hazar deňzi — Gara deňiz üstaşyr ugruny ösdürmegi özara hereket etmegiň strategik ugurlary hökmünde kesgitlediler.

Ykdysady meseleler bilen bir hatarda, söhbetdeşler ylym-bilim gatnaşyklaryny, syýahatçylyk pudagyny, şeýle hem medeni-ynsanperwer ulgamdaky gatnaşyklary giňeltmek barada jikme-jik pikir alyşdylar. Aşgabatdaky Şota Rustaweliniň we Tbilisidäki Magtymguly Pyragynyň heýkelleri bu ugurdaky gatnaşyklaryň aýdyň nyşanlarydyr. Döwlet saparynyň netijesi boýunça türkmen-gruzin hyzmatdaşlygyny uzak möhletleýin esasda giňeltmäge gönükdirilen ikitaraplaýyn resminamalaryň uly toplumyna gol çekildi.