TÜRKMENISTANYŇ MERKEZI BANKYNYŇ GYMMAT BAHALY METALLAR WE GYMMAT BAHALY DAŞLAR GAZNASY

Aşgabatda «Kids EXPO: ähli zat çagalar üçin» atly halkara sergi-ýarmarkasy öz işine başlaýar. Türkmenistanyň hormatly Prezidenti Serdar Berdimuhamedow gözden geçirilişe gatnaşyjylara we myhmanlara gutlag ugratdy. Bu barada «Türkmenistan: Altyn asyr» elektron gazeti habar berdi.

Döwlet Baştutany öz gutlagynda ýurdyň çagalaryň sagdyn ösmegi, döwrebap bilim almagy we döredijilik ukyplaryny ösdürmegi üçin ähli zerur şertleri döredýändigini nygtady. Prezidentiň belläp geçişi ýaly, ýokary hünärli, beden we ruhy taýdan sagdyn, kämil tilsimatlardan baş çykarýan ýaşlary terbiýeläp ýetişdirmek döwlet syýasatynyň möhüm wezipeleriniň hatarynda durýar.

Bu iri möçberli forum ýurdumyzyň we daşary ýurtlaryň çagalar üçin harytlar hem-de hyzmatlar pudagynda iş alyp barýan kompaniýalaryna, bilim edaralaryna we halkara guramalara öz döwrebap önümlerini, hyzmatlaryny we geljekki ösüş ugurlaryny görkezmäge giň mümkinçilik döredýär.

Sergi-ýarmarkanyň meýdançasynda çagalaryň aň taýdan ösüşine, döredijiligiň, aýdym-sazyň, sungatyň we sportuň olaryň durmuşyndaky ähmiýetine bagyşlanan aýratyn bölümler hödürlener. Şeýle hem çäräniň çäginde özboluşly bäsleşikler we gyzykly ýaryşlar guralyp, ol ene-atalar we çagalar üçin hakyky baýramçylyga öwrüler.

Döwlet Baştutany gutlagynyň soňunda sergi-ýarmarka gatnaşyjylaryň we myhmanlaryň hemmesini çäräniň açylmagy bilen gutlap, olara berk jan saglyk, abadançylyk hem-de alyp barýan işlerinde uly üstünlikleri arzuw etdi.