TÜRKMENISTANYŇ MERKEZI BANKYNYŇ GYMMAT BAHALY METALLAR WE GYMMAT BAHALY DAŞLAR GAZNASY

Türkmenistanyň Prezidenti Serdar Berdimuhamedowyň başlyklygynda sanly ulgam arkaly geçirilen Hökümet mejlisinde gurluşyk we senagat toplumynyň 2026-njy ýylyň ýanwar — maý aýlarynda bitiren işleriniň jemleri jemlenildi. Mejlisde Ministrler Kabinetiniň Başlygynyň orunbasary Baýmyrat Annamämmedow hasabat döwründe amala aşyrylan önümçilik we gurluşyk işleriniň netijeleri barada giňişleýin maglumat berdi. Bu barada «Türkmenistan: Altyn asyr» elektron gazeti habar berdi.

Bellenilişi ýaly, hasabat döwründe gurluşyk we senagat toplumy tarapyndan öndürilen önümleriň we ýerine ýetirilen hyzmatlaryň umumy meýilnamasy 130,1 göterim derejede amala aşyryldy. Pudaklar boýunça alanyňda, Gurluşyk we binagärlik ministrligi meýilnamany 106,3 göterim, Senagat we gurluşyk önümçiligi ministrligi 126,7 göterim, Energetika ministrligi bolsa 107,5 göterim ýerine ýetirmegi başardy.

Şeýle hem, Awtomobil ýollary ministrligi tarapyndan meýilnama 110,6 göterim berjaý edilen bolsa, “Türkmenhimiýa” döwlet konserni boýunça bu görkeziji 152,7 göterime deň boldy. Aşgabat şäheriniň häkimligi boýunça meýilnamanyň ýerine ýetirilişi 130,1 göterim bolup, paýtagtymyzy ösdürmek boýunça bellenen wezipeler üstünlikli durmuşa geçirildi.

Hormatly Prezidentimiz hasabaty diňläp, gurluşyk we senagat toplumynyň önümçilik kärhanalarynyň doly kuwwatynda işledilmeginiň zerurdygyna ünsi çekdi. Döwlet Baştutanymyz ýurduň sarp edijilerini hem-de ilaty elektrik energiýasy bilen bökdençsiz üpjün etmek, ýol gurluşygynyň hili we saklanyşy baradaky gözegçiligi has-da güýçlendirmek wezipelerini goýdy. Şonuň bilen birlikde, wise-premýere şu ýylyň dowamynda açylyp ulanmaga berilmegi meýilleşdirilýän ähli binalaryň we desgalaryň gurluşygyny bellenen möhletlerde hilli tamamlamagy berk gözegçilikde saklamagy tabşyrdy.