TÜRKMENISTANYŇ MERKEZI BANKYNYŇ GYMMAT BAHALY METALLAR WE GYMMAT BAHALY DAŞLAR GAZNASY

Aşgabatda Türkmenistanyň welosiped sporty boýunça milli ýygyndysynyň hem-de Abu-Dabiniň (BAE) welosiped klubynyň bilelikdäki okuw-türgenleşik ýygnanyşygy başlandy. Halkara türgenleşik düşelgesi 20-nji awgusta çenli dowam eder we türgenleri möwsümiň iň iri ýaryşlaryna taýýarlamakda möhüm tapgyr bolar.

Ministrler Kabinetiniň mejlisinde hormatly Prezidentimiz Serdar Berdimuhamedow bilelikdäki ýygnanyşygyň geçirilmegini makullady. Bu bolsa Türkmenistan bilen Birleşen Arap Emirlikleriniň arasyndaky halkara sport hyzmatdaşlygyny ösdürmekde nobatdaky ädim boldy.

Türkmenistanyň paýtagtyna Abu-Dabiden 28 adamdan ybarat wekilçilikli topar geldi. Onuň düzümine klubuň ýolbaşçylary, tälimçiler düzümi, tehniki hünärmen we 24 türgen girdi. Myhmanlar «Türgenler» myhmanhanasynda ýerleşdirildi. Türgenleşikler Olimpiýa şäherjiginiň häzirki zaman sport desgalarynda, şeýle hem Aşgabadyň we onuň töwerekleriniň awtomobil ýollarynda geçirilýär.

Taýýarlyk maksatnamasynda şosse ýollaryndaky türgenleşiklere aýratyn üns berilýär. Welosipedçiler her gün Atatürk, Arçabil we Köpetdag şaýollarynyň ugrunda, şeýle hem Gökdere jülgesiniň gözel künjeklerinde türgenleşik sürüşlerini geçirýärler. Ýygnanyşygyň dowamynda türgenler uzynlygy 60 kilometrden 150 kilometre çenli bolan türgenleşik ugurlary boýunça jemi takmynan 1270 kilometr aralygy geçmeli bolarlar.

Olimpiýa şäherjiginiň welotregindäki meşgullanmalaryň maksatnamasy hem baý bolar: alty ýöriteleşdirilen türgenleşik sessiýasy, şeýle hem türgenleri taýýarlamagyň häzirki zaman usullaryna, türgenleşik işini guramaga, ýol hereketiniň howpsuzlygy hem-de lukmançylyk taýdan üpjünçilik meselelerine bagyşlanan üç okuw-usulyýet maslahaty meýilleşdirildi. Ähli çäreler ugurdaş döwlet edaralary bilen hyzmatdaşlykda geçirilýär.

Türkmenistanyň Welosiped sporty federasiýasy bilen Abu-Dabiniň klubunyň arasyndaky sport hyzmatdaşlygy 2023-nji ýyldan bäri ösdürilýär. Şu döwürde taraplar yzygiderli bilelikdäki türgenleşikleri geçirýärler, tejribe alyşýarlar we halkara ýaryşlara gatnaşýarlar. Şuňa meňzeş ýygnanyşyklar Aşgabatda 2023, 2024 we 2025-nji ýyllarda geçirildi, türkmen welosipedçileri bolsa 2023 we 2024-nji ýyllarda iki gezek Abu-Dabide geçirilen höwesjeňleriň arasyndaky «Gran Fondo» ýaryşyna gatnaşdylar.

Häzirki ýygnanyşyga Türkmenistan tarapyndan ýurdumyzyň iň güýçli 15 welosipedçisi gatnaşýar, olar baş tälimçi Kakabaý Ataýewiň we uly tälimçi Igor Ýoldaşewiň ýolbaşçylygynda türgenleşýärler.

Bellenilişi ýaly, ýygnanyşyk tamamlanandan soň türkmen topary Taýlanda gider we 28 — 30-njy awgust aralygynda trek welosiped ýaryşlary boýunça Aziýanyň Kubogyna gatnaşar. Milli ýygyndy üçin möwsümiň esasy wakasy bolsa 19-njy sentýabr — 4-nji oktýabr aralygynda Ýaponiýanyň Aýti prefekturasynda we Nagoýa şäherinde geçiriljek XX tomusky Aziýa oýunlary bolar.