TÜRKMENISTANYŇ MERKEZI BANKYNYŇ GYMMAT BAHALY METALLAR WE GYMMAT BAHALY DAŞLAR GAZNASY

Türkmenistan bilen Birleşen Milletler Guramasynyň Ösüş Maksatnamasy (BMGÖM) durnukly energetika ulgamynda strategik hyzmatdaşlygy mundan beýläk-de pugtalandyrmak barada ylalaşdylar. Geçirilen resmi çäräniň çäklerinde Türkmenistanyň daşky gurşawy goramak ministri Öwezgeldi Goşjanow hem-de BMGÖM-niň ýurdumyzdaky Hemişelik wekili Narine Saakýan ýurduň uzakdaky ilatly nokatlarynda energetika geçişini goldamaga gönükdirilen bilelikdäki taslama resminamasyna gol çekdiler. Bu barada Türkmenistanyň daşky gurşawy goramak ministrliginiň metbugat gullugy habar berdi.

Täze bilelikdäki başlangyç esasy infrastruktura merkezlerinden uzakda ýerleşýän sebitleriň energiýa üpjünçiliginiň ygtybarlylygyny ýokarlandyrmagy we olary döwrebap, ekologiýa taýdan arassa energiýa çeşmeleri bilen üpjün etmegi maksat edinýär. Taslama pes uglerodly we has netijeli energetika modeline geçmek, şeýle hem gaýtadan dikeldilýän energiýa çeşmelerinden peýdalanmagyň gerimini giňeltmek babatda möhüm ähmiýete eýedir.

Uzakdaky sebitlerde energetika geçişiniň goldanylmagy elýeterli we ygtybarly energiýa çeşmelerine ählumumy elýeterliligi üpjün etmek boýunça halkara tagallalary bilen doly utgaşýar. Taslamanyň çäklerinde Gün energiýasyndan peýdalanmak, energiýa netijeliligini ýokarlandyrýan innowasion tehnologiýalary ornaşdyrmak hem-de häzirki zaman energetika ulgamlaryny dolandyrmakda ýerli ilatyň mümkinçiliklerini pugtalandyrmak ýaly ugurlara aýratyn üns berler.

BMGÖM bilen bu ugurdaky hyzmatdaşlygyň ösdürilmegi Türkmenistanyň ekologiýa we «ýaşyl» energetika başlangyçlaryny yzygiderli durmuşa geçirmäge bolan ygrarlylygyny nobatdaky gezek tassyklaýar. Bu ädim ýurduň ähli sebitleriniň ilaty üçin deň durmuş-ykdysady mümkinçilikleri döretmäge hem-de uzakdaky ilatly ýerleriň howa we energetika bilen bagly şertlere durnuklylygyny berkitmäge giň ýol açýar.